Campanha electorau

Qüestions e arresponses sus era campanha electorau

Guaire dure era campanha electorau?

Era campanha electorau dure 15 dies.

Comence tàs 00 h 00 deth dia 15 de seteme de 2017 e finalize tàs 23 h 59 deth dia 30 de seteme de 2017.

En quines dates son proïbides era difusion e era publicacion de sondatges electoraus?

Demore proïbida era publicacion e difusion totau o parciau o era reproduccion d’enquèstes o sondatges d’opinion per quinsevolhe mejan de comunicacion pendent es cinc dies anteriors ath dera votacion (entre eth 26 e eth 30 de seteme).

Com se distribuïssen es espacis electoraus publics destinadi ara campanha enes mejans de comunicacion?

Es formacions politiques damb representacion en Parlament de Catalonha an dret ar usatge deth 70% des espacis electoraus publics destinadi ara campanha, entre es quaus se repartís de manèra proporcionau ath nombre de sètis obtengudi enes darrères eleccions ath Parlament de Catalonha der an 2015. Eth 30% der espaci electorau restant se repartís entre es organizacions interessades acreditades d’acòrd damb eth nombre de signatures presentades.

Com se distribuïssen es espacis informatius publics enes mejans de comunicacion de titolaritat publica?

Es formacions politiques damb representacion en Parlament de Catalonha an dret ar usatge deth 70% des espacis informatius publics gratuïts enes mejans de comunicacion de titolaritat publica. Era Administracion electorau distribuís er usatge des espacis entre es formacions politiques damb representacion en Parlament de Catalonha d’acòrd damb es resultats obtengudi enes darrères eleccions en Parlament. Eth 30% restant se repartís entre es organizacions interessades acreditades d’acòrd damb eth nombre de signatures presentades.

Es grops politics non includidi en apartat anterior pòden amiar a tèrme actes de campanha electorau damb es sòns pròpris mejans e son legitimadi entà formular reclamacions deuant era Administracion Electorau deth Govèrn dera Generalitat de Catalonha.