Burèus de vòte

Qüestions e arresponses sus es burèus de vòte

 

Qué son es burèus de vòte?

Eth burèu de vòte ei eth lòc a on s’emet eth vòte, se contròtle eth debanament dera votacion e s’amie a tèrme eth recompde e er escrutinh provisòri.

Un burèu de vòte ei format per un president/a e dus membres.

 

Com s’elegissen es membres deth burèu de vòte?

Era formacion des burèus de vòte correspon ara Administracion electorau deth Govèrn, jos era supervision dera Sindicatura Electorau de Catalonha.

Es membres des burèus de vòte e es sòns suplents se designen per tiratge public demest era totalitat des persones recensades ena seccion corresponenta que siguen menores de 70 ans.

 

Com se notifiquen es nomentaments des membres deth burèu de vòte?

Es persones designades membres de burèu arreceberàn era notificacion dera sua designacion en tèrme de dus dies dempús dera designacion. S’aguesta notificacion se produsís mès tard, eth retard non serà causa invalidanta dera designacion.

Amassa damb era notificacion, es persones designades arreceberàn ua manuau d’instruccions sus es sues foncions supervisat pera Sindicatura Electorau de Catalonha.

 

Quini drets an es membres des burèus de vòte?

Es persones qu’agissen coma membres de burèus de vòte, an dret a:

  • Un permís retribuït pendent eth dia dera votacion, s’ei obrant, e ua reduccion de cinc ores dera jornada laborau londeman dera votacion.
  • Era proteccion deth sistèma dera seguretat sociau, davant es contingéncies e situacions que poguen derivar-se dera sua participacion en referendum. (PENDENT DE CONFIRMACION)

 

Ei obligatòri eth cargue de president/a o membre?

Òc, er exercici deth cargue de membre d’un burèu de vòte (president/a membre) ei obligatòri, non volontari, sense perjudici de poder allegar causes justificades e documentades qu’empedisquen era acceptacion deth cargue.

 

Quin tèrme è entà allegar desencuses coma membre d’un burèu de vòte? A on me cau presentar-les?

Es persones que ajatz estades designades membres d’un burèu de vòte auètz eth tèrme de tres dies entà allegar, deuant era sindicatura electorau de demarcacion corresponenta, causa justificada e documentada que vos empedisque era acceptacion deth cargue.

 

Quin tèrme an es sindicatures electoraus de demarcacion entà resòlver es desencuses allegades?

Era sindicatura electorau de demarcacion corresponenta deu resòlver es allegacions laguens deth tèrme de dus dies. Contra era decision dera sindicatura electorau de demarcacion non se pòt recórrer.

 

Qué me cau hèr se non pogui a anar eth dia dera votacion tath collègi electorau entà hèr part deth burèu de vòte?
  • S’un còp transcorrut eth tèrme entà presentar desencuses vos trobatz ena impossibilitat de presentar-vos ar exercici deth vòste cargue, vos cau comunicà’c ara sindicatura electorau de demarcacion corresponenta, aumens, 72 ores abans der acte de constitucion deth burèu e auratz de fornir es justificacions que siguen de besonh. S’er empediment arribe dempús d’aguest tèrme, er avís ara sindicatura se deu hèr de manèra immediata e, en tot cas, abans dera ora de constitucion deth burèu de vòte.
  • S’er empediment arribe dempús d’aguest tèrme e eth dia dera votacion non podetz anar tàs 8.00 h, er avís tara sindicatura electorau de demarcacion se deu hèr de manèra immediata e, en tot cas, abans dera ora de constitucion deth burèu de vòte.

 

En cas qu’eth dia dera votacion sigue obrant entà jo, è dret a un permís entà èster membre d’un burèu de vòte?

Òc. Es persones que non gauditz de pòsa setmanau eth dia dera votacion e acreditatz era condicion de membres de burèu de vòte o d’interventors, auetz dret a gaudir d’un permís retribuït en tot correspóner ara jornada complèta d’aguest dia e ara reduccion des cinc prumères ores dera jornada de trabalh posteriora, tanben damb dret a retribucion.

Aguesti permisi, de caractèr non recuperable, vos seràn retribuïdi pera entrepresa un viatge justificada era accion coma membre de burèu de vòte o interventor/a.

 

A on pogui obtier eth justificatiu qu’è estat membre d’un burèu de vòte?

Podetz utilizar coma prumèr justificatiu entara entrepresa ua còpia dera notificacion dera vòsta designacion coma president/a o membre. Posterioraments, podetz sollicitar ara Sindicatura Electorau de Catalonha un justificatiu d’auer complit damb eth cargue pendent era jornada electorau.

 

A quina ora se constituís eth burèu de vòte?

Eth burèu de vòte se constituís tàs 8.00 h deth dia dera votacion.

Eth president/a, es dues membres e es corresponents suplents s’amassen, en collègi electorau que correspon a cada burèu de vòte, entà constituïr eth burèu de vòte damb eth sosten deth representant dera Administracion.

 

Com se constituís eth burèu de vòte eth dia dera votacion?

Cada titular dera mesa a dus suplents. Es titulars e es suplents deueràn presentar-se en locau electorau tàs 7 h 30 deth dia 1 d’octobre.

Se se presenten toti es titulars, es burèus de vòte se constituïssen damb aguesti.

S’eth president/a non se presente, deu èster substituït en tot seguir er orde següent:

  • peth sòn prumèr suplent,
  • s’eth prumèr suplent non i ei, peth dusau suplent;
  • se non i a cap suplent, agís coma president/a eth prumèr membre, e
  • s’eth prumèr membre non i ei, eth dusau membre
  • S’es membres non s’an presentat en collègi electorau o ben prenen possession coma president/a:
  • Seràn substituïdi pes suplents respectius

En cas que non se poguen hèr es substitucions nomentades, era sindicatura electorau de demarcacion corresponenta designe immediataments es persones que deueràn constituïr eth burèu de vòte, e pòt ordenar que ne hèsquen part eth nombre d’electors presents en locau que siguen de besonh segons er orde en que siguen disposadi entà votar.

 

Se pòt constituïr un burèu de vòte sense president/a o bèth membre?

Non se pòt constituïr eth burèu de vòte sense era preséncia d’un president/a e dus membres.

En cas que non se compde damb eth nombre de membres sufisents, era sindicatura electorau de demarcacion corresponenta designe immediataments es persones que deuen constituïr eth burèu de vòte, e pòt ordenar que ne hèsquen part eth nombre d’electors presents en locau que siguen de besonh segons er orde en que siguen disposadi entà votar.

 

Un còp constituït eth burèu de vòte, qué fan es suplents?

Un còp constituït eth burèu de vòte, es suplents que non agen estat nomentadi finauments membres deth burèu de vòte, pòden abandonar eth collègi electorau e demoren exempts des sues obligacions.

 

Quin materiau ei de besonh entara votacion?

Cada burèu electorau deu disposar aumens des elements següents:

  • Ua urna, degudaments barrada e sagerada.
  • Un nombre sufisent d’envolopes e de bulletins de vòte.

 

Un membre deth burèu de vòte pòt abandonar eth burèu temporauments?

Òc, cada viatge que i rèsten aumens dus membres deth burèu de vòte.

 

Qué se passe s’en burèu de vòte an demorat dus membres e un d’eri a d’absentar-se momentàniaments?

Era votacion demore interrompuda enquia qu’eth membre absent torne ath sòn lòc.

 

En cas qu’eth burèu de vòte rèste temporauments damb un solet membre, era sindicatura electorau de demarcacion pòt demanar a un/a votant que se tròbe en aqueth moment en locau que hèsque part deth burèu de vòte?

Òc. Era sindicatura electorau de demarcacion pòt ordenar a un elector/a que hèsque part deth burèu.

 

Qué se passe se sò membre d’un burèu electorau e eth dia dera jornada electorau arribi tard?

Se s’a hèt er acte de constitucion deth burèu, non poderatz préner possesion coma membre deth burèu de vòte, pr’amor qu’auratz estat substituït per ua persona suplenta.

 

Qué se passe se sò membre d’un burèu electorau e ath long dera jornada electorau me meti malaut?

Era votacion deu contunhar damb es membres restants deth burèu de vòte.

 

Qui me substituís se sò president/a d’un burèu de vòte e ath long dera jornada me meti malaut?

Seratz substituït peth membre prumèr. S’eth membre dusau non i ei d’acòrd, eth vòste vòte de qualitat coma president/a deth burèu de vòte vos autorize a préner aguesta decision.

 

Se pòt invalidar eth resultat dera votacion pera abséncia des membres d’un burèu de vòte?

Non. Mès supòse ua irregularitat.

 

Ath long dera jornada electorau, pogui èster arrestat/ada pendent er exercici deth mèn cargue coma membre d’un burèu de vòte o interventor/a?

Non. Non podetz èster arrestat/ada per cap autoritat, exceptat que i age un delicte flagrant.

 

Ath delà de membre deth burèu de vòte, pogui participar laguens d’un burèu de vòte de bèra auta manèra?

Ath delà deth president e des dus membres, pòden dar assisténcia as actes deth burèu de vòte e participar enes sues deliberacions es interventors e es apoderadi formauments nomentadi e acreditadi.